ಭಾರತದ ಪ್ರತಿಕ್ರಿಯೆ ಬೆನ್ನಲ್ಲೇ ಭಾರತೀಯ ಪ್ರಯಾಣಿಕರಿಗೆ ಕ್ವಾರನ್ಟಿನ್ ನಿಯಮ ಸಡಿಲಿಕೆ ಮಾಡಿದ ಯುಕೆ | ಜನತಾ ನ್ಯೂಸ್

ನವದೆಹಲಿ : ಯುಕೆ(ಇಂಗ್ಲೆಂಡ್)ಯಿಂದ ಆಗಮಿಸಿದ ಪ್ರಯಾಣಿಕರಿಗೆ ಭಾರತವು 10 ದಿನಗಳ ಕಡ್ಡಾಯ ಕ್ವಾರನ್ಟಿನ್ ಘೋಷಿಸಿದ ಕೆಲವು ದಿನಗಳ ನಂತರ, ತನ್ನ ತಪ್ಪನ್ನು ಸರಿ ಪಡಿಸಿಕೊಂಡಿರುವ ಯುಕೆ ಭಾರತದ ಲಸಿಕೆ ಪ್ರಮಾಣಪತ್ರವನ್ನು ಅಕ್ಟೋಬರ್ 11ರಿಂದ ಸ್ವೀಕರಿಸುವುದಾಗಿ ಘೋಷಿಸಿದೆ. ಭಾರತದಲ್ಲಿನ ಯುಕೆ ಹೈ ಕಮಿಷನರ್ ಭಾರತೀಯರಿಗೆ ನಿಯಮಗಳ ಸಡಿಲಿಕೆ ಘೋಷಿಸಿದ್ದಾರೆ.

ಯುಕೆ ನೀತಿಗೆ ತಕ್ಕಶಾಸ್ತಿ ಎಂಬಂತೆ ಭಾರತ ಸರ್ಕಾರ, ಭಾರತಕ್ಕೆ ಆಗಮಿಸುವ ಎಲ್ಲಾ ಯುಕೆ ಪ್ರಜೆಗಳ ಮೇಲೆ ಭಾರತವು ಕಡ್ಡಾಯ ಕ್ವಾರನ್ಟಿನ್ ಹೇರಿತ್ತು. ಈ ಹೊಸ ನಿಯಮಗಳು ಅಕ್ಟೋಬರ್ 4ರಿಂದ ಜಾರಿಗೆ ಬಂದಿವೆ ಮತ್ತು ಪ್ರಯಾಣಿಕರ ವ್ಯಾಕ್ಸಿನೇಷನ್ ಸ್ಥಿತಿಯ ಹೊರತಾಗಿಯೂ ಅನ್ವಯಿಸಲಾಗುತ್ತದೆ.

ಯುಕೆ ದೇಶವು ತನ್ನ ಪ್ರಯಾಣ ನೀತಿಯನ್ನು ಬದಲಾಯಿಸದಿದ್ದರೆ ಪ್ರತಿಯಾಗಿ ತಕ್ಕ ಕ್ರಮಗಳನ್ನು ವಿಧಿಸುವುದಾಗಿ ಭಾರತ ಈ ಹಿಂದೆ ಯುಕೆಗೆ ಎಚ್ಚರಿಕೆ ನೀಡಿತ್ತು. ಯುಕೆಯಲ್ಲಿನ ಹಿಂದಿನ ನಿಯಮಗಳ ಪ್ರಕಾರ, ಕೋವಿಶೀಲ್ಡ್‌ನ ಎರಡು ಡೋಸ್‌ಗಳೊಂದಿಗೆ ಲಸಿಕೆ ಹಾಕಿದ ಭಾರತೀಯರನ್ನು ಲಸಿಕೆ ಹಾಕಿಲ್ಲ ಎಂದು ಪರಿಗಣಿಸಲಾಗುತ್ತಿತ್ತು.